To je odmah dalo rezultat na masterstu u Sinsinatiju – Cicipas je u drugoj rundi bio bolji od Fabijana Marožana u dva seta i tako je prekinuo seriju od pet vezanih poraza.
„Sjajno je što se vratio u moj tim, on je nepobjediv. Jako dugo smo radili zajedno i gajimo mnogo lijepih uspomena. Istina je da odnos oca i sina nekada može da bude komplikovan, to ne poričem. Imali smo dobre i loše trenutke, kao i slabu komunikaciju – ali nismo savršeni. Povjerio sam mu se kao nikada do sad, važno je da razvijem tu naviku i budem bolji s riječima. On je izuzetna osoba, oblikovao me je kao tenisera i čovjeka. Mnogo mu dugujem, želim da zajedno izgradimo nešto posebno i nezaboravno”, kazao je Cicipas o Apostolosu i potom se nadovezao:
„Nikada nisam radio ni sa kim toliko odlučnim, on me inspiriše i pokazuje da bi učinio sve za mene. Prethodne godine nismo proveli mnogo vremena na terenu, bio je tu samo u ulozi oca i nedostajao mi je u tenisu”, poručio je trenutno 29. reket planete.
Cicipas će u trećem kolu igrati protiv Benžamana Bonzija koji je iznenadio osmog nosioca Lorenca Musetija sa 2:1 u setovima.
Stefanos iza sebe ima jednu dosta lošu sezonu, a osvojio je jednu titulu – slavio je na turniru u Dubaiju.
