Meč na „Olimpiku“ će se pamtiti i po odluci trenera „stare dame“ Igora Tudora da u 86. minutu iz igre izvuče Vasilija Adžića, iako je na teren ušao tek 10 minuta ranije.
Hrvatski stručnjak je tada izvukao iz igre i Fransiska Konseisaoa, koji je na poluvremenu ušao umjesto Nika Gonsalesa, a na teren su ušli Dušan Vlahović i Federiko Gati.
Tudor je rekao da je to uradio zbog visine, kako bi imao prednost u skoku s igračem manje, ali je nejasno zašto je onda u 76. minutu ubacio Adžića, ako je od 60. bio isključen Pjer Kalulu?
„Izvinio sam se i nije mi bilo drago, ali morao sam to da uradim zbog visine. Donio sam odluku koja nije lijepa, ali je bila za dobrobit tima. Ponovo bih to uradio“, rekao je Tudor.
Takva odluka se nije isplatila treneru Juventusa, jer je Lacio do izjednačenja došao nakon što je lopta prije pogotka Vesina preletjela upravo Gatija.
„Bila je ovo dobra utakmica, žao mi je zbog finiša. Uzimamo ovaj bod i idemo dalje. Momci su dali sve od sebe, maksimum s obzirom na probleme koje imamo. Čestitao sam svima u svlačionici“, naglasio je Tudor.
